انا

انا بنت وعمري 22 س 

ولدت بيوم 28/8

في صغري ماشفت يوم مر كل يوم لعب وفرح ..

وكان هذا وقت الغالي عايش ..

كان يخسر روحه بس يرسم البسمه على شفاهنا ..

مرت الأيام وجاء اليوم اللي فقدته فيه ..

صح كنت صغيره ومادري وش يعني مات

سألت وقالوا لي بس مافكرت انه بيجي يوم وافقده

قلت ماراح يجي يوم واقول ابي ومالقى جوابي

صح عندي اخوان بس للاسف ماهم سند والله ماهم سند ماعوضوني بشي واحد عن بعده

بيوم وفاته وش سويت ..؟؟!

كنت العب مع اخواتي ولاادري وش اللي صاير

مدري انه بيجي يوم وابكي  هالبكى

مدري انه بيجي يوم وتظل دموعي رفيقة عيني

ويصير الالم يعصر قلبي وجع

مدري انه بيجي يوم انادي وماحد يرد علي

مدري انه بيجي يوم ونا الوي على روحي من الجوع

مدري انه بيجي يوم اشوف امي تعبانه وتتألم ولااحد يهتم فيها

مدري انه بيجي يوم واروح المدرسه والابله تطلب مني شغله ومااجيبها وللاسف تفشلني قدام كل الطالبات..

مدري انه بيجي يوم وانظلم من كثثثير ناس..

مدري انه بيجي يوم وتجي خالتي وتقول البيت هذا بيتي مو بيتكم خالتي ياناس..

راح الغالي رااااح  

راح وراحت ايامه 

راح وراحت البسمه

راح وماعاد لي بايام الفرح